Kamisinaup havaanga ittuq uumannga Kuin Kivgaqtuqtinga Kanataup Aviktuqhimayunginnut.
Nunavut piqaqtuq taiyuyuq “piyunnautiqaqtuq kavamat” imaatut ittuq Maligaliurvikmi Hivuliqtingit atanniuqtut ikayuqtaunnginnaqqat amigaittunit maligaliuqtiuyunit niruaqtauhimayunit maligaliurvikmi.
Tuhaqtipkaitjut kanatap kavamanganit:
Kanataup Kavamangat, aatjkutariquplugu tikinnahuarutinganut inuit ukiuqtaqtumit, ikayuqtaa piliurninnga akhuuqtunik kavamaliqinirmik avikturhimayunik kiuttaaqtunik inukminut.
Havaarilluaqtaa Kamisinaup naunairiami ihuaqtumik piliurhimayuq kavamat talvani iinnaqtuq unalu inmikkut ihumamigut piyangit inuit tammaqtailiyut.
Tamna Nunavut Maliganga ihariagiyuq Kamisinaup piliuriami hulilukaaqtakhangit Maligaliurvikmi Hivuliqtinginnut pitqutihimayauninnganut Maligaliurvikmut.
Ublumi, Maligaliuqtiuyut Maligaliurvikmi katimavaktut ihumaliuriamiknik kitu inuk Hivuliqtiuhunnguyuq (qablunaatitut taiyauyuq Premier-mik) Ministauyukhaniklu. Una tuniyauyuq ilitariyauyumik Maligaliurvikmit Kamisinamut. Talvannga Ministauyut munariyakhangit pitqutiyukhaq Kamisinamut kitut havaariyakhangit tuniyauniaqtut niruaqtauhimayunut ministauyukhanut.
Titiraqhimayumi Nunavut Maligangani Kamisina piyunnautiqaqtuq piinginnariaqtaanganik Maligaliuqtut uqaruirumi Maligaliurvikmi Hivuliqtingit.
Naunaitkutinga havaanganut Kamisinaup
Kamisina atuqpagait piyunnautingit naunaitkutaugumi nunavunmut, ikayuutikhutik ilumuurutingit inuit angirutigiyangit munariyauyutikhangit.
Kuin Kivgaqtuqtinga Kanatami naunaiqtaa nunaryuap kanatauplu piumaninngat tamaita inuit Kanatami, talvuuna Kamisinaup naunaiqtaa piumayanginnit inuit nunavunmi. Tamarmiknit Kuin munariniqmut naunaitkutauyuq atauhikkalaarutauyumut hapkunannga atauttimuungittunut piumayauyunik.
Kamisinaup “Munaqtiuyuq” kihimi unaunngittuq Munaqtiuyuq Kavamatkunnut”.
Kamisina avaliittuq havaariyaa ittumik naunaitkutauyuq nuanvunmut, pipkaitjutigiyuq piumayanginnik nunavunmiutat inuknit.
Maligakhat angiqtauyut Maligaliurvikmit maliganngunngittut kihimi Kamisinaup angiqqagu. Kamisinaup angiqpagait maligakhat uqaqtaugaangami Hivuliqtimit (qablunaatitut taiyauyuq Premier-mik)
Piyunnautinga kamisinaup ilaliutiqaqtuq tamarmik maligaliqinirmik qangaraaluknitanik atuqtauninnginnik. Maligaliqinirmut munariniq ilaliutiqaqtuq tikkuaqtauniq maligaliqiinik maligaliurvikmit Maligaliurvikmi Hivuliqtinginnitlu, taiguaqniq uqauhinganik angmaqtirininnganik katimanikhanganut maligaliurviup sainiutinginniklu titiqqanik katimatjutikhanginnik, Kamisinaup uqaqtakhanginnik, maligaliqinirmut tikkuaqniq qanuritaakhaanginniklu Kamisinaup Nunaqutingat.
Qangaraaluknitanik munariniq ilaliutiyuq Kamisinaup ilauninnga ilitariyauyuni katimapkailirumik tunirhailunilu uqaqtakhanginnik maligaunngittunik.
