ᒪᓕᒃᑕᐅᕙᒃᑐᑦ ᑲᒥᓯᓇᐅᒃ ᐃᓚᐅᕝᕕᒋᔭᖏᓐᓄᑦ ᐱᓕᕆᐊᖑᔪᓄᑦ
ᑲᒥᓯᓇ ᐃᓚᐅᔭᕌᖓᑦ ᐱᓕᕆᐊᖑᔪᒧᑦ ᐱᓕᕆᕝᕕᒋᔭᕆᐊᖃᖅᑕᒥᓄᑦ, ᐱᖃᑎᖃᖅᐸᒃᐳᖅ ᐃᑲᔪᖅᑎᒋᓂᐊᖅᑕᒥᓂᒃ ᐱᒃᑯᒋᔭᐅᓯᒪᔪᒥᒃ. ᑖᓐᓇ ᐃᑲᔪᖅᑎᒋᔭᐅᔪᖅ ᒫᓐᓇᒃᑯᑦ ᐱᓕᕆᕙᒃᐳᖅ, ᐱᓕᕆᖃᑦᑕᕐᓂᑰᓪᓗᓂᓘᓐᓃᑦ, ᑲᓇᑕᒥᐅᑦ ᐅᓇᑕᖅᑐᒃᓴᖏᓐᓂ (ᐅᒥᐊᖅᑐᖅᐸᒃᑐᓂᒃ, ᓄᓇᒦᑉᐸᒃᑐᓂᒃ ᐅᓇᑕᖅᑐᒃᓴᓂ ᖄᖓᑕᓲᒃᑯᓪᓘᓐᓃᑦ ᐅᓇᑕᖅᑐᒃᓴᕆᔭᐅᔪᓂᒃ), ᑲᓇᑕᒥᐅᓄᑦ ᐸᓖᓯᒋᔭᐅᔪᓂᒃ, ᓄᓇᓕᖕᒥᐅᓂᓘᓐᓃᑦ ᐸᓖᓯᒋᔭᐅᔪᓂᑦ. ᑖᓐᓇ ᐃᑲᔪᖅᑎᒋᔭᐅᓂᐊᖅᑐᖅ ᑎᓕᔭᐅᕙᒃᐳᖅ ᐱᔨᑦᑎᕋᖁᔭᐅᕙᒃᖢᓂ ᑲᒥᓯᓇᐅᑉ ᑕᐃᒪᐃᖁᓕᕌᖓᒍ ᑖᓐᓇ ᑲᒥᓯᓇᒋᔭᐅᔪᖅ ᑲᒥᓯᓇᐅᑎᑕᐅᓂᖓᓂ. ᑕᐃᔭᐅᓂᖓ ᑕᐅᑐᒃᖢᒍ, ᑖᓐᓇ ᐃᓂᖃᖅᑎᑕᐅᓂᖅ ᑕᐃᒪᐃᑦᑐᒥᒃ ᐱᒻᒪᕆᐅᕗᖅ ᓂᕈᐊᖅᑕᐅᓯᒪᓪᓗᓂᓗ ᑲᒥᓯᓇᒧᑦ ᐃᑲᔪᖅᑎᒋᔭᐅᓂᐊᕐᓗᓂ ᐱᒻᒪᕆᐊᓘᒋᕗᖅ.
ᐊᒥᓲᓂᖅᓴᐃᑦ ᑲᒥᓯᓇᒧᑦ ᐃᑲᔪᖅᑎᒋᔭᐅᕙᒃᑐᑦ. ᐅᓪᓗᓕᒫᖅ ᐃᖅᑲᓇᐃᔮᖃᖅᐸᒃᐳᑦ ᐊᔾᔨᒌᙱᑦᑐᓂ ᐃᖅᑲᓇᐃᔮᕆᔭᐅᕙᒃᑐᓂ ᐃᓚᖏᑦ ᐱᓕᕆᐊᖃᖅᐸᒃᖢᑎᒃ ᐅᓇᑕᖅᑐᒃᓴᓂ ᓄᓇᓕᖕᓂᓘᓐᓃᑦ ᐱᓕᕆᐊᒃᓴᒥᓂ. ᑕᐃᒪᐃᓐᓂᖓᓄᑦ, ᑕᒪᒃᑯᐊ ᑕᒪᕐᒥᒃ ᐱᔨᑦᑎᕋᖅᐸᒃᐳᑦ ᒪᓕᒃᖢᑎᒃ ᐱᕕᒃᓴᖃᕐᕕᒋᔭᒥᓂᒃ.
ᖃᐃᖁᔨᓂᖅ ᑲᒥᓯᓇᒋᔭᐅᔪᒥᒃ ᓄᓇᕗᒻᒥᐅᓄᑦ ᖃᓄᐃᓕᐅᕐᓂᕆᔭᐅᔪᒧᑦ
ᓯᕗᓪᓕᖅᐹᖑᕙᒃᑐᖅ ᖃᐅᔨᑎᑕᐅᔪᖅ ᑲᑐᔾᔨᖃᑎᒌᓂᑦ ᖃᐃᖁᔨᓕᕌᖓᒥᒃ ᑲᒥᓯᓇᒥᒃ ᐃᓚᐅᖁᓪᓗᒍ ᖃᓄᐃᓕᐅᖅᑕᐅᔪᒧᑦ ᑎᑎᕋᕐᕕᒋᕙᐅᒃ ᑲᒥᓯᓇᒋᔭᐅᔫᑉ. ᑖᒃᑯᐊ ᑲᑐᔾᔨᖃᑎᒌᖑᔪᑦ ᑐᓴᖅᑎᑦᑎᓪᓗᐊᖅᐳᑦ ᑲᒥᓯᓇᐅᑉ ᑎᑎᕋᕐᕕᖓᓂᒃ ᖃᓄᖅ ᓂᕆᐅᒋᔭᖃᕐᒪᖔᕐᒥᓂᒃ. ᑲᒥᓯᓇᐅᑉ ᑎᑎᕋᕐᕕᖓ ᑐᓂᓯᓇᔭᖅᐳᖅ ᐱᔭᐅᔭᕆᐊᓕᖕᓂᒃ ᐱᓕᕆᓂᕐᒧᑦ ᐊᑐᖅᑕᐅᓇᔭᖅᑐᓂᒃ ᑕᒪᒃᑯᐊᓗ ᒪᓂᒪᕙᒃᖢᑎᒃ ᐊᑐᖅᑕᐅᔪᓐᓇᖅᓯᑎᑕᐅᓯᒪᓪᓗᑎᒃ ᑕᒪᒃᑯᓄᖓ ᐱᓕᕆᐊᖑᓂᐊᖅᑐᒥᒃ ᐋᖅᑭᒃᓱᐃᔪᓄᑦ.
ᑖᓐᓇ ᐃᑲᔪᖅᑎᒋᔭᐅᔪᖅ ᖃᐅᔨᒋᐊᑐᐃᓐᓇᕆᐊᖃᕐᒥᔪᖅ ᑲᑐᔾᔨᖃᑎᒌᖑᔪᒥᒃ ᖃᐅᔨᒪᑦᑎᐊᓕᕈᒪᓂᕐᒥᓄᑦ ᐱᕙᒌᔭᖅᑕᐅᓯᒪᔪᓂᒃ ᑕᕝᕙᓂ ᐱᓕᕆᐊᖑᓂᐊᖅᑐᒥ ᖃᓄᑐᐃᓐᓇᕐᓗ ᐃᑲᔪᕈᓐᓇᕐᓂᕐᒥᒍᑦ ᐃᑲᔪᕐᓗᓂ ᑕᐃᒪᐃᑦᑕᕆᐊᖃᕈᓂ ᓲᕐᓗ ᒪᑯᓄᖓ:
- ᓇᒧᙵᖅᐸᑦ ᑎᑭᓐᓇᔭᕐᒪᖔᑦ
- ᑲᒥᓯᓇᐅᑉ ᑐᙵᓱᒃᑎᑕᐅᓂᖓ
- ᑲᒥᓯᓇᐅᑉ ᑭᓇᐅᓂᖓᓄᑦ ᓇᓗᓇᐃᔭᖅᑕᐅᓂᖓᓄᑦ
- ᐃᒃᓯᕚᕐᕕᐅᓇᔭᖅᑐᓂᒃ ᐋᖅᑭᒃᓱᐃᓂᕐᒧᑦ
- ᑲᒥᓯᓇᐅᑉ ᐊᐅᓪᓚᕐᓂᖓᓄᑦ
ᑖᓐᓇ ᐃᑲᔪᖅᑎᒋᔭᐅᔪᖅ ᑲᒥᓯᓇᒥᒃ ᐱᖃᑎᖃᖅᐸᒃᑲᓗᐊᖅᑎᓪᓗᒍ, ᑖᓐᓇ ᐃᒃᓯᕚᕆᐊᖃᙱᑦᑐᖅ ᐃᓂᒋᔭᐅᔪᒥ ᓯᕗᓕᖅᑏᓪᓘᓐᓃᑦ ᐃᒃᓯᕚᕐᕕᒋᔭᖓᓂ. ᐃᒪᓐᓇᐅᒐᔪᖕᓂᖅᓴᐅᔪᖅ, ᓈᒻᒪᖕᓂᖅᓴᐅᓲᖑᕗᖅ ᑖᓐᓇ ᐃᑲᔪᖅᑎ ᐃᒃᓯᕚᕈᓂ ᑭᐳᒥ ᐊᒡᕕᐊᖅᑐᖅᑕᖃᙱᑦᑎᐊᖅᑐᒥ ᑕᐅᑐᒍᓐᓇᑦᑎᐊᕐᓗᓂᐅᒃ ᑲᒥᓯᓇ ᐱᓕᕆᐊᕆᔭᒃᓴᒥᓂᒃ ᐱᓕᕆᐊᖃᕐᓂᐊᕐᓗᓂ. ᐱᓕᕆᐊᒃᓴᖓ ᐃᑲᔪᖅᑎᒋᔭᐅᔫᑉ ᐃᑲᔪᕆᐊᖃᕐᓂᖅ ᑲᒥᓯᓇᒋᔭᐅᔪᒥᒃ ᐱᓕᕆᐊᒃᓴᒥᓂᒃ ᐱᓕᕆᐊᖃᖅᑎᓪᓗᒍ, ᑕᐃᒪᐃᓕᐅᕐᓂᕐᒥᓂᓗ ᐃᑲᔪᕐᓗᓂ ᖃᓄᐃᓕᐅᖅᑕᐅᓂᐊᖅᑐᒧᑦ ᐋᖅᑭᒃᓱᐃᕙᓪᓕᐊᔪᓂᒃ ᑕᒪᓐᓇ ᖃᓄᐃᓕᐅᖅᑕᐅᕙᓪᓕᐊᓂᐊᖅᑐᖅ ᑲᔪᓯᐊᑦᑎᐊᖁᓗᒍ, ᐊᑐᕐᓂᖃᑦᑎᐊᕐᓗᓂᓗ ᐱᓕᕆᓂᐅᖁᓪᓗᒍ.